ASOCIACION SOCIO-EDUCATIVA ANTONIO GANDOY

Estimada familia:

A “Asociación socio-educativa Antonio Gandoy” é unha entidade sen ánimo de lucro de recente creación que, conformada por extraballadores da extinguida Fundación Preescolar na Casa,  ten como misión principal preservar, difundir e dar continuidade ó labor socioeducativo desenvolvido por Preescolar na Casa.

A “Asociación socio-educativa Antonio Gandoy”, ofrece ás familias con nenos menores de tres anos a posibilidade do encontro e intercambio con outras familias e con un profesional da educación, co fin de que poñan en valor o seu importante papel como educadoras e que compartan dúbidas.

Estes encontros, denominados “Espazos das Familias”, teñen como fin que os pais e as nais, en definitiva as familias, conten con un lugar onde compartir, debater e reflexionar sobre a marabillosa experiencia da crianza dos nenos e nenas; coñezan actividades que lles permitan afrontar unha maternidade e paternidade responsable e gozosa, que contribúa ó mellor desenvolvemento dos seus fillos e fillas e, por extensión, da sociedade futura; e favorezan que nenas e nenos interactúen on outros das mesmas ou parecidas idades e cos adultos.

Estes Espazos desenvólvense semanalmente en diversos lugares e concellos.

En Lugo temos en marcha os seguintes:

·         CEIP A Ponte, os luns ás 11’30.

·         CEIP Manuel Mallo Mallo (Nadela) os xoves ás 16’30

·         Locais da Asociación: Garaballa de Arriba, 9 (ó lado do colexio de Albeiros), os Martes en horario de mañá e tarde. Neste local temos previsto organizar mais grupos en función da demanda existente.

Tamén existen Espazos das Familias nos concellos de Rábade, O Cádavo, Aranga, Frades, Mesía…

Si tes interese en participar, ponte en contacto

nos teléfonos: 982 216 001 e  629 612 897,

ou a través do enderezo de correo-e: antoniogandoyeducación@gmail.com

******************************************************************************

A Asociación socio-educativa Antonio Gandoy, é unha entidade sen ánimo de lucro que ten como fins primordiais defender e reivindicar a importancia educativa da familia nos primeiros anos , así como un compromiso firme coa lingua, a cultura, a contorna e o saber propios como bens imprescindibles para o desenvolvemento da persoa.

Convencidos de que a familia é insubstituíble no proceso educativo da infancia, e que o fogar é o primeiro e máis importante ambiente de aprendizaxe, pretendemos contribuír ao óptimo desenvolvemento dunha práctica parental  positiva.

Queremos axudar a mellorar a competencia educativa familiar e a fornecer a relación pais/fillos

PRECISAMOS A TÚA  AXUDA para poder acadar os nosos obxectivos en prol de unha sociedade galega máis xusta que teña en conta ós nenos e ás nenas e ás súas familias e para difundir unha cultura da infancia, das súas necesidades, potencialidades e dereitos, promovendo a creación de servizos de atención socio-educativa a familias de diferentes colectivos, promovendo a igualdade de oportunidades e a conciliación da vida familiar e laboral.

Podes COLABORAR  como:

 socio numerario con unha aportación anual de 40 euros: recibirás información de tódalas nosas actividades; tamén poderás contar cun servizo de asesoría na crianza da túa filla ou do teu fillo; e contarás con descontos especiais nas distintas actividades que se organicen.

Socio protector, facendo un donativo polo importe que desexes: esta aportación permitirá desenvolver as actividades da asociación e podelas achegar ós sectores mais desfavorecidos.

Voluntario: precisamos xente disposta a traballar por unha sociedade máis igualitaria e xusta, que achegue ás familias a posibilidade de formarse para exercer a súa paternidade e a súa maternidade.

Para  obter mais información:

email:   antoniogandoyeducación@gmail.com

tfos.: 982 21 60 01   ///     629 612 897

 

Esperando contar coa vosa participación, recibide un cordial saúdo.